Romans 4

Abalahahi hapa'a

1To lali tatatifu Abalaha ai kumu hena ka lilune? Ai Hu'mamofitoga hena hu'ehina? 2Ai hetofa suhi babu luto hulata mino'ehina'mu lamana bo nohane lutita Abalaha gufa'a limo titi hutita'mu yabe. To Hu'mamofihi bulo gufa'a limo titi mehilina'mu yabe. 3Mono bukugu fayahi ge'ahana: Abalahau Hu'mamofitoga agoya hu emi'ehinamu'i Hu'mau komopa'a bu goloto lamana bo nohibe luto lu'ehina. 4To bona'i moneuba foya lilenogo lili'nalo lilina'mu yabe. Foya li'ehinaloti efa mina'a lilibe. 5To bona'i moneuba nani'ni bebe sanamofihi foya'a lolo mehilube'mu nani Yesuhi ai'asigo anasi keheli ule'ale hilube luto lulata bo yamofihi Hu'mau foipana'a li he'mi etoto lamana bo nohibe luto'a nolibe. Ya'ma keheli ule'ale huse'na'a Hu'mau bu goloto ana bomofihi le'mo bati hilina'mu yabe. Hu'mau ai'amo kehelito ana bo kumu ya luto lu molo'ehina yabe. 6To koyapa bo, Tebitiu ai ana ka hapa'aguti kaga lu'ehina. Hu'mau lamana bo yabe luto fa'mene le'malina bouba gelo bilibe luto, Tebitiu ma fayahi koyo'ehina:

 7
  • Hu'mau foipana'a li he'mi eto'ehina bouba
  • gelo biba biba nohinagihe.
  • Hu'mau foipana'a kele li eto'ehinagihe.
 8
  • To Hu'mau bo mone'mofihi foipana'a
  • leka mesalina
  • yana bouba fokehi sipi luto minalinagihe.
    •

    9Ya'ma enegelo nebinamagihi Tebitiu lu'ehinana enugufalo laga hi'ahanamagi kumu anasi lu'ehifiye? O'e, Yege yege enugufa laga mehi'ahana bona'magi hiti kumu luto lu'ehina yabe. Nani mono kaguti lu'ohuna:Abalahau Hu'mamofitoga agoya hu emi'ehigo ananamu'i lamana bo nohibe luto Hu'mau ya lu'ehina. 10To ya'ma kaga hiya kanagu lu'ehibe? Gufalo laga hu'ehina kanagu lu'ehifi to yata'a gufalo laga mehu'ehina kanagu lu'ehibe? Yata'a Abalaha gufalo laga mehuse kanagu Hu'mau lamana bo nohibe luto lu'ehina yabe. 11Alihi Abalahau gufa'alo laga hu ete'ahago mino'ehina. Anana hena ni'ibe? Abalahau Hu'mamofihi keheli ule'ale hu'ehigo Hu'mau lamana bo nohane lu'ehina. To ya'ma alipo gufa'a laga huto

    molo'ehinamofihi keya'a suhi huto hu'ehina. Ya huto Abalahau kohe toto asaga bona'i enugufa'ani laga mehuse'namagi Hu'mamofitoga keheli ule'ale hite mine'ahanamagihi afo'anifu nohibe. Ana bona'magi Hu'mamofihi bulo bebe sose'i nehabe.     12To Abalahau ai ana huto bona'i luga'a enugufa'ani laga hi'ahanamagihi afo'anifu nohibe. Enugufa'ani laga hi'ahana yamofi kumu afo'anifu nohifiye? O'e, Yata'a Abalahau gufa'a laga mehu'ehina kanagu Hu'mamofihi keheli ule'ale huto mino'ehina suhi luto enali neminana'mu afo'anifu nohinagihe.

    Hu'mau koyapa'i kaga lu molo'ehina'a huto hilina'mu yabe

    13Koyapa kanagu Hu'mau Abalahahi kaga lu emi'ehina: Asaga hepa'i hiti me'mo hiti yagapanakamagihi epilube luto kaga molo'ehina. Abalahau mone keya ka mege'i molo'ehinamu'i Hu'mau ya'ma kaga molo emi'ehinafiye? O'e. Abalahau agoya hu emi'ehinogo lamana bo nohibe luto ya'ma Hu'mau kaga lu molo eto'ehina. 14Bona'i moneuba keya kasigo mege'i malalinaya Humau kaga molo'ehinamofihi keheli ule'ale huse'i hapa'a fenene hitita'mu yabe. To Hu'mau kaga lu molo'ehina'a hiti fenene hitita'mu yabe. 15Ana keya ka ni'inogo bona'mofihi foipana'ani huto hilina'mu to Hu'mau hima muhi fi epalalibe. To keya ka meni'inogo bona'magi keya ka mege'i memelete pelesa ilatanamo meminalina'mu yabe.

    16To Hu'mau lu molo'ehina ka hapa'a henana ni'ibe? Lali aitoga keheli ule'ale huse'na ya ni'ibe. To hena'mube? Ana kagamo fa'mene limi'ehina suhi huto Abalahahi yagapana'a asaga'magihi hiti ana kaga molo epolo'ehina. Lali Yuta bona'i keya ka mege'i nomalaluta bonatoga hiti to Abalaha suhi luto Hu'mamofihi agoya hu emise bonatoga hiti ya'ma kaga molo leto'ehina yabe. Abalahau ai lali asaga bona'magita afotifu nohinagihe. Hena'mube? Ai Hu'mamofihi keheli ule'ale hu'ehina yamofihi lelepi'ehibe. 17Koyapa'i Abalaha kumu mono bukugu fayahi ge'ahana:Nani babu noto noto bona'magihi afo'aniga kele'mo lolo nohube,luto Hu'mau ya luto lu molo'ehina. To Abalahau Hu'mamofihi bulo minoto ana kagamofihi keheli ule'ale hu'ehigo ana kaga molo'ehinauba huto hulatamo ni'ibe. Hu'mau fili'ahana bona'i enele'mo ho tilata nohina bouba to ana'ina asaga'na huto mehu'ehina alihi le'mo huto hilina bouba ya'ma kaga lu molo'ehina yabe. 18Abalahau ai'a naga'a bu megose minoto Hu'mau ma'naka nolibe luto lulata to keheli ule'ale huto Hu'mamofihi huto hilina kana'a geba huto mino'ehina. Yamu'i Hu'mau aimo babu noto noto bona'i afo'anifu le'mo ho ti'ehina yabe. Ananamu'i mono bukugu fayahi mone ge'ahana:Bonaka tatakafu babu luto huto hilabe. 19Ana kanagu Abalahau ai lebato 100 foya kana melugu mino'ehina. Ai oyafamofihi gufa'a pisigi'ehigo to liha'a Selahi litana'i huto pana'i meketalina huto mino'ehina. Etugufa'atiti amuya memolo'ehinagi Abalahau ana kagalo ekesa yigito keheli ule'ale huto komopa'a amuya molo'ehina. 20Ana kagalo kehelise'na'a fenene mehu'ehigo Hu'mau kaga molo'ehinamu'i loe lae mehu'ehina. Kehelise'na'auba amuya molo eto'ehina. To yamu'i Hu'mamofihi foke ka lu emi'ehina. 21Ai Hu'mau kaga molo'ehinanamu komopa'agu keheli ule'ale huto alihi hu netalibe luto keheli fe luto mino'ehina. 22To Abalahau Hu'mamofihi keheli ule'ale hu'ehinamu koyapa'i fayahi ge'ahana:Hu'mau bu goloto lamana bo nohibe luto lu'ehina. 23Yana Hu'mamofihi bulo lamana bo nohibe luto lu'ehina ka keye'ahana ya'ma aisigo ka meni'ibe. 24Lali kumu hiti ana fayahi keye'ahana yabe. Sipi Boti Yesu fili'ehinaguti Hu'mau le'mo ho ti'ehinalo komopati emito keheli ule'ale huto minalutamofihi Hu'mau lamana bona'i nehabe luto lulata nohibe. 25To Yesu lali foipanati li he'mi letalibe luto Hu'mau ho lifigo oto fili'ehina. Ya hulago aku'i Hu'mau fili'ehinagati le'mo kosaba holoto lali kumu bebe sana bona'i lele'mo lolo hu'ehina yabe.
    Copyright information for BEF